脆皮金莎奶黃月餅

好耐冇整63g月餅啦！因為我覺得50g比較精致，而且仲可以一人一個，小食多滋味嗎！不過用嚟送禮，就送大個d得體d啦！

點解今次又要咁早整月餅呢？全因為阿女要求囉！因阿女話想聽日送比將會返加拿大嘅朋友喎，本來仲話佢自己整添，不過。。。。。

我呢個都算係廿四孝阿媽掛！？嘻嘻。

獨立包裝，一盒3個，再加封條。

加多個外層包裝，完成。

可以出得街啦！

餅皮：（8 x 63g）

［材料］

無鹽牛油　　54g

糖粉　　　　32g

蛋黃　　　　16g

全脂奶粉　　16g

低筋麵粉　　94g

吉士粉　　　11g

雲尼拿油　　1/4茶匙

［奶黃餡］
做法按此　　225g

［餅面］

蛋黃　　　　半個
老抽　　　　1-2滴

［糖水］
砂糖　　　　10g
滾水　　　　10g

［其他］

高筋麵粉　　適量
月餅模　　　63g
畫筆　　　　1枝　　
毛掃　　　　1把　　　　

做法：

1. 凍牛油切丁粒，加糖、已篩低筋麵粉、奶粉、吉士粉，用手指尖搓成沙粒狀。
2. 加入蛋液及雲呢拿油，用手指好似按摩般搓勻成糰（不要用掌心推/按/壓，以免起筋及搓溶牛油）。
3. 將麵糰平均分割8等份（約28g），滾圓，放雪櫃雪15分鐘。
4. 將餅皮隔著保鮮紙按平（外邊薄，中心厚），不要太大片，夠包2/3餡就得。
5. 放上一粒奶黃餡，將餅皮向上反起緊貼著餡，然後用虎口將餅皮邊轉邊推上，將整粒餡包好及收口（略略搓造圓柱形，直徑要比月餅模口細）。
6. 月餅模內掃上高粉（多餘凳出），餅皮表面也掃上高粉（多餘掃走），然後放入月餅模內（收口向外）。
7. 檯面撒少許高粉，將月餅模放上檯面，小心垂直按壓定型（手要定，不要移位）。
8. 將模移去已鋪牛油紙焗盤上，小心垂直脫模（手要定，不要移位），將整盤月餅放入雪櫃雪30分鐘或以上。
9. 預熱焗爐250度，放入月餅焗5分鐘（無須解凍）。
10. 出爐後，用畫筆沾上蛋液（在碟邊刮兩下），然後薄薄掃在凸起花紋上。
11. 放涼十分鐘，再放入200度焗爐焗8-10分鐘（水波爐要加一個焗盤墊底隔熱）。
12. 出爐後，立即掃上糖水，再焗約3分鐘（水波爐可用燒烤模式）。
13. 出爐後，放上烤架放涼，待完全冷卻後才可以入盒或包裝。

貼士：3天內未食完，要放雪櫃儲存，食前用焗爐150度（不預熱）焗5-10分鐘。