鳳梨奶黃月餅（2018新口味）

又係時候整月餅啦！不過如果吾係因為細妹返左嚟，我都未必會咁快做。事關細妹月中就要返英國，所以我要趁佢走之前，趕快整多幾款口味比佢試。

2018第一爐，梗係要試新嘢啦！今次係鳳梨酥與奶黃月餅crossover呀！連我自己都未食過，吾知夾吾夾呢！嘻嘻。不過阿仔一返嚟就食左兩個啦！冇comment，但就食左兩個，答案應該係正面掛，哈哈。

今年冇買新月餅模，因近幾年實在買得太多，多到冇一百都接近呢！最後仲買／玩到訂製，無論中文名，英文名，什至姓氏，樣樣都造齊，咁就吾驚會同人撞款啦！哈哈。

不過終於都要斷捨離，如成品花紋吾清楚嘅，通通都冇得留低（舊嘅吾去新又點嚟）。其實我冇做大嘥鬼，我將吾要嘅都送晒比姐姐（連有名果d都比埋），冇感到罪惡架，哈哈哈。

材料：（8 x 50g模）

鳳梨餡　　　60g
做法按此

菠蘿刨粗絲（我用蘿蔔刨），食落比幼絲有口感，而且仲冇咁乾。

完成後，即是緊貼一張保鮮紙，放涼後可放雪櫃保存。

奶黃餡　　　120g
做法按此

今次用左天然雲呢拿油（含籽），所以會見到一點點黑點，千奇米以為污糟呀！哈哈。

完成後，即是緊貼一張保鮮紙，放涼後可放雪櫃保存。

餅皮：

無鹽牛油　　40g

糖粉　　　　24g

蛋黃　　　　12g

全脂奶粉　　12g

低筋麵粉　　70g

吉士粉　　　8g

雲尼拿油　　1g

餅面：

蛋黃　　　　半個
老抽　　　　1-2滴

糖水：
砂糖　　　　10g
滾水　　　　10g

其他：

高筋麵粉　　少許
細頭畫筆　　1枝　　
毛掃　　　　1把　　　　

做法：

1. 將鳳梨餡混合奶皇餡，然後平均分割8等份（約22g），滾圓，放冰箱冷藏備用。
2. 凍牛油切細粒，加糖、低筋麵粉（已篩）、奶粉、吉士粉，用手指尖搓成沙粒狀。
3. 加入蛋液及雲呢拿油，用手指好似按摩般搓勻成糰（不要用掌心推按壓，以免起筋及搓溶牛油）。
4. 將麵糰平均分割8等份（約22g），滾圓，放雪櫃雪15分鐘。
5. 將餅皮隔著保鮮紙按平（外邊薄，中心厚），不要太大片，包裹到2/3餡就夠。
6. 放上一粒鳳梨奶黃餡，將餅皮反上緊貼著餡，然後用虎口將餅皮邊轉邊向上推，將整粒餡包好及收口。
7. 餅模內掃上高粉（多餘凳出），餅皮表面也掃上高粉（多餘掃走），然後放入月餅模內（收口向外）。
8. 檯面撒少許高粉，將月餅模放上檯面，小心垂直按壓定型（手要定，不要移位）。
9. 將模移去已鋪牛油紙焗盤上，小心垂直脫模（手要定，不要移位），將整盤月餅放入雪櫃雪30分鐘。
10. 預熱焗爐250度，放入月餅焗5分鐘（無須解凍）。
11. 出爐後，用畫筆沾上蛋液，再在碟邊刮兩下，然後薄薄掃上餅面（只掃凸起花紋部分）。
12. 放涼十分鐘，再放入200度焗爐焗8-10分鐘（水波爐要加一個焗盤墊底隔熱）。
13. 出爐後，立即掃上糖水，再焗2-3分鐘（水波爐用燒烤模式）。
14. 出爐後，稍為放涼後轉放上烤架，待完全冷卻後才可以入盒或包裝。

貼士：3天內未食完，要放雪櫃儲存，食前用焗爐150度（不預熱）焗5-10分鐘。

材料

牛油粒加全部份

用手指尖搓成炒粒狀

加入蛋液及雲呢拿油（含籽），搓勻成糰。

餅皮（一點點係雲呢拿籽）

鳳梨奶黃餡

將月餅雪30分鐘

放入已預熱250度焗爐焗5分鐘

見到嗎？牛油紙好乾爽呀！冇焗到出油。

蛋黃加老抽（可上色D），記住掃之前要將畫筆刮乾少少。

蛋液只掃凸起花紋，吾好油出界呀！

出爐即掃糖水，再入爐燒烤2-3鐘。

出爐啦！