豬肉價格仍然高企，作為慳家的C9，由於自制成本高，所以都係停一停諗一諗。
如果想食叉燒，就唯有幫親燒臘檔啦！但試過咁多間（連食神叉燒都試埋），都買吾到一間令屋企人滿意。吾通想食舊正叉燒都咁難？答案：係！真係好難。都係怪我屋企人對叉燒要求太高，太奄尖吧！哈哈。
星期五晚，放工去左惠康shopping，買左3盒「泰正」冰鮮豬腩肉（共1050g，折後$89.5），諗住買嚟焗叉燒。等星期六醃定，星期日咪有得食囉。
第一次用4S焗叉燒，基本上同水波差不多，只係溫度去吾到240度，最高只有230度，但好彩並無影響效果。今次係4S第3次焗，暫時表現都非常理想，效果亦超滿意（絕對比水波有過之而無不及）。
其實自家制叉燒，真係好花時間／心機／功夫，基本上會冇左一晝（三四個鐘）。由其係慢烤，真係少Ｄ心機都吾得，冇得行開架，真係要企定定，全程好忙好忙好忙（真係好忙，所以要講3次）。
雖然真係好麻煩，冇晒時間，但當屋企人食完，個個都讚口不絕嘅時候，就乜都值番晒啦！哈哈。可以誇口講句，我整嘅叉燒真係出面食吾到架，哈哈。
**試過中國同澳洲冰鮮豬，覺得今次泰國冰鮮豬最好，下次可以繼續。但吾建議用急凍豬，無論效果同味道都差好遠，吾好味（已試過）。**
超淋超滑超正（真心的買吾到）
材料：
豬腩肉 800g
生粉 3湯匙
醃料：
砂糖 4湯匙
幼鹽 1茶匙
雞粉 1茶匙
海鮮醬 1.5湯匙
蠔油 1.5湯匙
芝麻醬 1/3湯匙
生抽 1/3茶匙
老抽 1/3茶匙
乾葱茸 1茶匙
蒜茸 1茶匙
紹興酒 1/2湯匙
雞蛋 1隻
生粉 3湯匙
掃面：
百花蜜 1/2碗
做法：
- 豬腩肉切走皮不要，然後切出帶骨一層肉（做其他餸菜），然後洗乾淨（不須瀝乾），加3湯匙生粉撈勻（太乾可加少許水），醃4小時（放入保鮮盒存雪櫃）。
- 4小時後，取出洗乾淨（不須瀝乾），加3湯匙生粉撈勻。
- 將全部醃料拌勻（除生粉外），然後加入（2）內撈勻，放入保鮮盒，存入雪櫃醃兩小時或過夜。
- 取出腩肉（汁留用），放在已鋪牛油紙焗盤上。
- 放入已預熱230度焗爐，焗10分鐘，反轉再焗10分鐘。
- 取出掃上醃汁，100度焗30分鐘（每隔10分鐘掃一次醃汁），反轉再焗30分鐘（每隔10分鐘掃一次醃汁）。
- 取出掃上蜜糖，230度焗5分鐘，反轉再掃上蜜糖，再焗5分鐘。
- 取出掃上蜜糖，100度焗30分鐘，反轉再掃上蜜糖，再焗30分鐘。＊＊鍾意甜D，可掃厚D蜜糖＊＊
其實我專登焗燶邊架（只係焦香，吾苦架）
