輕怡牛油磅蛋糕

雖然今日係母親節，但母親都係要做嘢嘅，不過只係做個簡單蛋糕啫。平時我會做一個個cupcake，但今日為左容易拎出街，所以轉做磅裝，可以一條條裝住，而且仲有蓋，方便好多。

其實做呢個蛋糕係有另一個目的，就係想用吓呢樽雲呢拿醬。樽醬係朋友早幾個月買，不過佢只用過一次咋（新屎坑），佢見就嚟到期（6月中），而又吾會再用，又吾想嘥，於是就過左比我，諗住我可以快D用埋佢。但其實咁短時間，一定用吾切啦！我只好盡力啦！

原來呢樽醬都幾貴，橘子賣緊$160樽呀！我都係第一次用呢種醬，估吾到隻醬嘅質地咁杰（似枇杷膏），入面仲有好多一點點雲呢拿籽架。聞落雖然冇雲呢拿油咁濃香（人造/假），不過就可以食得健康d，話晒天然㗎嗎！。

芝士蛋糕（凍餅）

早幾個月，媽媽嚟我度食飯，嚟之前佢同家姐去超市shopping，點知買錯盒忌廉芝士（想買芝士醬），佢地又吾會做甜品／蛋糕，所以就留低比我。擺左咁耐（6月到期），今日終於有機會用左佢啦！忌廉芝士對我嚟講，我只會做蛋糕，所以今次都吾例外，都係做芝士蛋糕咋！哈哈。

咁啱尋日買左兩盒士多啤梨，可以用一盒嚟做蛋糕，另一盒就留比阿仔同阿女，咁就吾會比佢地炸型啦（佢地次次都吾比我做甜品，話嘥左喎，無奈。）！

今日呢個係原味芝士蛋糕，芝士味吾重，比較清新。以往我會在蛋糕面做咖啡雲石，但今次就轉做生果，效果更清新呢！

自家製叉燒小貼士（如何選擇靚梅頭）

想自家製到一舊靚叉燒，可以說易不易，說難不難。因好多時，大家都會以為好容易（如果吾講究的話），但對我嚟講，真係吾係易事。

記得第一次焗叉燒，雖然買到舊自以為好靚嘅梅頭肉，點知焗完出嚟，又嚡又乾，搞到比屋企班奄尖又嘴刁嘅食家（大老爺，大少，大小姐）彈到上天花，踩到落落地呀！

自此之後，我並無放棄，而且仍繼續試。直至到第三次，終於比我研究到原因，開始識得去選肉，選吾啱令願吾做，千奇吾好夾硬買，夾硬焗。雖然買啱肉，但都要煮法配合，所以我繼續再研究煮法。試過幾種做法後，最後，我發覺都係慢煮方法最好，又淋又滑又juice。所以，我以後都會用慢煮方法嚟做叉燒啦！

為左令大家可以買到啱嘅梅頭，所以今朝9點，我就特登去街市一趟，希望見到靚梅頭，可以影到比大家睇吓。雖然好彩比我見到，但第一刀就比人買左，所以今次呢舊比較短D，但都冇影響嘅。

原舊梅頭

＊約三斤重＊

焗叉燒餐包

因為焗左叉燒，所以有叉燒做叉燒包囉！

叉燒包有兩種，一種係焗，一種係蒸，今日就做款焗啦！兩款叉燒包嘅叉燒餡，做法吾一棣架，想做中式叉燒包，可睇我另一個post。

我比較鍾意食焗叉燒餐包，因為Ｄ餡吾會太多醬，而重點其實係包面層糖漿呀！糖糖地好好味架。

椰汁馬豆糕

雖然今日係五一假期，但都好似好忙咁，好似吾太多時間用。

首先為lunch預備個簡單pizza，然後再整多個簡單甜品（椰汁馬豆糕），跟住再整埋聽朝早餐（叉燒餐包）。最後，當然吾會少得一個簡單晚餐啦！就係咁，話咁快又過左一日啦！

缽仔糕

有人兩星期前，叫我吾好整咁多嘢食，所以我咪好聽話，吾整嘢比佢囉（嬲嬲🐷）。

人就係咁，有嘅時候吾珍惜，到冇啦！又。。。哼。。。哈。。。諗吓先啦！

尋晚有人問我，會吾會可以整d嘢呢？咁啱我烚左d紅豆，諗住整豆沙餡，見有人要求，咪滿足吓佢囉。

然後，跟住，就變左呢個甜品啦！

低溫慢煮秘製叉燒

已經有半年冇整叉燒啦！原因係買吾到啱梅頭，所以令願吾做，免得嘥時間兼嘥心機。如想食到好味道嘅叉燒，其實一Ｄ都吾容易。首先由買舊靚梅頭開始，然後就係時間啦！最重要當然係心機啦！

依家出街買到嘅叉燒，多數都係冰鮮豬肉，都要賣$90-100斤。如想食新鮮豬肉做嘅叉燒，吾係話冇，只係比較難，而且仲好貴，要$150-180斤呀！

尋日同阿女撑完檯腳（食早餐），見時間尚早，所以去街市走一趟，睇吓仲有冇緣遇到舊靚梅頭啦！好好彩，仲有一舊，於是我就叫豬肉佬切左兩斤比我啦（淨番尾瘦果舊吾要）！

提提大家，吾係全部梅頭都啱做叉燒，因梅頭都有肥有瘦。重點係切嘅方法，豬肉佬一般都會將舊肉橫切，咁係錯架，其實應該係要直切架。橫切雖然係有好多油花，但當焗完之後，油份就會消失，切片後會見到順紋，所以食落會又嚡又乾。相反直切的話，會見到肉係順／直紋，中間仲間住一條條肥（直條），即是一間肉一間肥，當焗完切片後，會見到肉係逆紋，所以食落會又鬆又軟。

想鬆軟當然要下Ｄ功夫啦！因梅頭肉比較結實，如果跟一般焗法，肉質會比較有彈性，有趙口。所以我比較鍾意慢煮方法，因叉燒做出嚟會比較淋滑鬆化。

要食就吾好懶啦！首先早一日做足準備，然後將肉醃一晚，跟住第日就慢煮3個鐘，再焗就得啦！每個步驟都好講心機架。可惜，食嘅人永遠吾會感恩，亦吾會明白做嘅人有幾咁用心呢！

今次用左半樽百花蜜（之前BBQ用淨）