雞蛋糕（蒸／焗）

做完甘露酥，用淨左少少紅豆餡，見得番咁少又做吾到d乜，所以就用左佢嚟整蛋糕啦（明天做早餐）！

呢款蛋糕除左可以蒸，仲可以焗。最後，我揀左焗，因為我比較鍾意香口。今次仲試埋分蛋法，感覺比全蛋難拌勻（麵糊好杰），所以下次都係用番全蛋法會好D。

甘露酥

阿仔細細個就好鍾意食一種零食，通常只會響樓下超市見到（CRC），透明膠袋包裝，外型不起眼，一粒包住dd蓮蓉餡嘅中式餅「嚒囉酥」，外型其實一d都吾吸引，而且仲會覺得cheap cheap地添。哈哈，其實我也從來沒正式吃過呢（最多只吃過一口）！都吾明點解阿仔咁Like。

上次整完鳳梨酥後，阿仔提起童年時小食，叫我不如試吓做d未曾整過嘅野，所以我就諗起佢「嚒囉酥」啦。

不過，網上找不到好的食譜參考，所以我轉左軚做甘露酥。

甘露酥係一個中式甜點，除了飲宴時會食到外（美點雙輝其中一煇呢！），好似都冇機會食到。今次我冇用到蓮蓉餡，轉左用自家製紅豆餡，應該都好味掛。

甘露酥材料其實好簡單，而且吾難做，最重要係我個食譜冇加到泡打粉同梳打粉架。

食後感：估吾到又幾好味喎，新鮮暖食時，個皮仲係好鬆脆架。有少少改進地方，就係餡皮比例，可以改兩份皮比一份餡。呢個餅餡其實可以有好多變化，如轉用蓮蓉、麻蓉、椰蓉和豆蓉等。自家製就係有呢個好處，鍾意食咩就轉咩，冇所謂。

缽仔糕

今日會整兩樣中式糕點小食，先嚟第一款「缽仔糕」。

最近食過一個缽仔糕，話係一間老字號出品，但真係越嚟越吾掂，一d都吾覺好食。都係自己整好好多，可以少甜又多豆，自己話事，而且仲係真材實料添。一個咁容易做嘅糕點，有時間一定要試吓做啦！

醃酸青瓜

見天氣開始轉熱，又係醃製食物好時機了。可以平時無無聊聊時咬兩舊，不知幾爽呀！而且仲超易做添。除左浸青瓜外，仲可以浸白蘿蔔、木瓜同紫薑架。

材料：
青瓜 2條
白米醋 500g
冰糖 500g
玻璃樽 1個

做法：

1. 白米醋加冰糖煮溶，攤凍備用。
2. 青瓜洗乾淨，切件，加鹽拌勻醃15分鐘。
3. 沖洗青瓜（鹽），再用飲用水浸洗一下。
4. 瀝乾水份後，將青瓜放入玻璃樽，然後注入已放涼糖醋水（浸過青瓜面）。
5. 存入雪櫃一至兩日即可食用。

黑糖粿麥包

嘩！好耐好耐冇整啦！記得舊年就係整呢個包嚟參加比賽。哈哈！好好彩仲入到八強添。眨吓眼又一年啦！

可能太耐冇整，所以忘記左用黑糖，用錯左白糖呢！其實我做包都係好隨意，除左粉同水要啱比例外，基本上都冇規定其他配料份量，多多少少，差吾多就算啦！與做甜品一d都吾同，做甜品我會跟足份量。

土鳳梨酥

上個禮拜六經過樓下間U Select，見佢有金菠蘿賣（$19.9），仲吾洗拎咁遠，梗係要買多幾個啦！兩個用左嚟整鳳梨酥，一個就切嚟食。預先煮好鳳梨餡，放入冰霜，隨時想做鳳梨酥都得。

今日節目臨時取消，見冇野做，就整吓鳳梨酥啦！已有一段時間冇整啦！不過冇諗過要一次整咁多啫，攰死人啦（估吾到今次鳳梨酥餡竟然有38份咁多）！就咁樣，搞吓搞吓又冇左半日囉！

尋晚焗完攤到今朝（散晒熱氣，咁就吾怕有倒汗水而發毛啦！），搵左兩款靚衫同佢地扮靚靚，封埋口，完成。依家可以帶佢去街街啦！

蜂蜜蛋糕

好似好耐冇做蜂蜜蛋糕啦！

仲記得第一次做蜂蜜蛋糕，失敗左。第二次再做，都係再失敗。直至第三次，我才可以掌握到。

諗番頭兩次失敗原因，其實都係被所謂嘅酒店食譜（沙田XX酒店蜂蜜蛋糕專訪視頻）所累，因佢講得吾清楚，資料又吾詳細（可能係特登咁講，等讀者做吾到）。

其實蜂蜜蛋糕在坊間有好多不同食譜和做法，但基本都係大同小異。所以我吾服輸的心態下，再繼續搜羅其他做法，然後再自己改試再改良。正所謂，只要有恆心，鐵柱磨成針，呢兩句話係冇錯架。

最後，經過多翻努力，深入研究、嘗試和實習，終於，我做到啦！成功啦！雖然未係100分，但都可以收貨啦！