有人會選擇買，乾手淨腳。但我會選擇煮，因我鍾意，哈哈！
今時今日香港，想食咩都得，買又得，煮又得，好容易就可以食到。
想當年，童年嘅時候，環境並不富裕，有好多餸菜要等過時過節至有機會食到，如冬菇，新鮮雞，燒肉等。仲有，要等做節至可以飲汽水呀！
講番舊燒腩肉，我由跑水開始，足足搞左半日，咁又冇晒時間做甜品啦！
材料：
五花腩 2斤
醃肉：
雞粉 2茶匙
幼鹽 1.5湯匙
糖 1湯匙
五香粉1茶匙
醃皮：
白醋 1/2湯匙
紹興酒 1/2湯匙
幼鹽 1茶匙（後落）
做法：
五花腩洗淨，跑水（跑水即是將肉加水一齊煲）20分鐘。
跑水後過冷河，然後拔乾淨豬毛。
用廚紙抹乾豬肉水份，放架，肉向上，皮向下。
將肉每隔1吋鎅開1吋深
將醃料混和塗抹肉的表面及鎅深位置（皮除外）
然後再塗抹四邊（皮除外），醃90分鐘。
完成後，將肉表面及鎅口位醃料全部刮走。
再用廚紙抹乾淨
肉放架上，皮向上，肉向下，用豬皮插將豬皮表面平均刺孔
（越多越好，但小心刺破脂肪屠）。
白醋加紹興酒混和
塗抹豬皮表面（肉除外）
用幼鹽塗抹豬皮表面（肉除外）
醃30分鐘
完成後，將幼鹽刮走，皮向上放烤架，放入已預熱200度焗爐，焗10分鐘。
10分鐘後取出，焗爐繼續保持200度溫度。
再用豬皮插刺多一次孔
將肉向上，皮向下，放回200度焗爐，焗30分鐘。
完成後取出，將焗爐提高溫度至250度。
將肉反轉，皮向上。
用鍚紙包好肉四邊，只露出豬皮，皮向上，放入已預熱250度焗爐，焗30分鐘。
完成後，燒烤10-15分鐘（我用水波爐，有燒烤模式。
如焗爐可以繼續250度焗多10-15分鐘）。
出爐放涼後，將燒黑部份用刀刮走，然後斬件上碟。
