今年我又推出一新口味【綠茶奶黃月餅】，真係從未試過，亦冇想過會做。哈哈。
其實我自己吾係咁好綠茶甜品，有得揀一定吾會揀。大家係咪想問，咁點解又要做綠茶呢？事關尋日放假，諗住做幾個月餅比媽咪，點知吉士粉只夠做奶黃餡，搞到個皮吾知點算。
於是搵勻全屋，都只係搵到可可粉，士多啤梨粉，紅麴粉，咖啡粉同綠茶粉。最後，我決定用綠茶粉，因為好似夾d，顏色又好似靚d囉。
今次個餅皮手感上比用吉士皮乾身，全程都無需戴上手套，搓團也不太黏手。今次造型至完成，花紋都算冇太走樣，可以出到7-8成。原因吾知關吾關今次焗法呢！
不過我用水波爐關係，所以焗嘅方法同過程，我都係以水波為主。而其他傳統焗爐，可以跟番自己過往做法做就得啦！
首先，將跟機黑盤放下層，面放跟機烤架。再準備自購大焗盤，鋪上矽膠墊。再用另一自購中焗盤，面放不黏墊/牛油紙，然後放上月餅。
水波爐焗月餅比傳統焗爐，真係麻煩好多，仲要失敗率高（象腳）。
今次過程還算順利，希望下次能保持水準啦！
（左：冇掃蛋，右：有掃蛋）
（上：冇掃蛋，下：有掃蛋）
材料：（8個50g模）
*脫水牛油 50g（或無鹽牛油）
糖粉 30g
蛋黃 12g
全脂奶粉 12g
低筋麵粉 70g
綠茶粉 8g
雲尼拿油 1g奶黃餡 200g （奶黃餡做法）
*因無需冷氣，只需室溫存放，所以可以減低象腳情況。
做法：
- 牛油加糖攪勻，加入蛋及雲尼拿油攪勻。
- 篩入低筋麵粉、奶粉和綠茶粉搓勻，然後將麵糰分割成8等份，搓圓（每份20g）。
- 將奶皇餡分割成8等份，搓圓（每份25g）。
- 將餅皮按平，周邊薄，中間厚，不要太大片，只需包裹到2/3餡就夠。
- 包入一粒奶黃餡，餅皮緊貼餡，然後用手虎口位將皮向上推上並收口。
- 餅模灑上高粉（多餘凳出），麵團撲上少許高粉（多餘掃走），然後放入月餅模內（收口向外），放上焗盤，然後小心垂直按壓（停留動作5秒），保持垂直鬆手脫模。
- 將整盤月餅放入冰格，冷藏30分鐘。
- 預熱焗爐250度，餅面噴少許水，入爐焗5分鐘，出爐掃蛋黃液，攤涼十分鐘，再掃一次蛋黃液，入爐200度焗5分鐘。
- 出爐後，放涼十分鐘，小心搬放跟機黑盤，180度焗5分鐘。
- 出爐後，整盤放涼一晚（面放一張牛油紙遮蓋）。
- 第二日可以入保鮮盒或包裝，如兩天內未食完，要放雪櫃儲存，食前用焗爐150度焗5-10分鐘。
（脫水牛油，無需冷藏。）
