今日再試焗奶黃月餅，搵左舊年，再舊年，再舊舊年嘅模片嚟印花。今次也有輕微象腳，但方模好似比圓模冇咁嚴重，總括都可接受。
今次焗法又改左少少，冇用咁多焗盤。首先放跟機焗盤在下層，然後放烤架。月餅焗盤鋪一塊矽膠墊，再鋪一塊不黏墊，面再放上月餅（脫模）。
雖然焗法同綠茶奶黃月餅差不多，但綠茶月餅嘅花紋好似立體D。如果下星期有時間的話，我再試吓焗紫薯奶黃月餅。
出爐前後比較
材料（約180g麵團）：（8個50g模）
脫水牛油 50g
糖粉 30g
蛋黃 12g
全脂奶粉 12g
低筋麵粉 70g
吉士粉 8g
雲尼拿油 1g
奶黃餡 180g （奶黃餡做法）
掃餅面：
蛋黃 1個
蜂蜜 適量
高粉 適量
做法：
- 牛油加糖攪勻，加入蛋及雲尼拿油攪勻。
- 篩入低筋麵粉、奶粉和吉士粉搓勻，然後將麵糰分割成8等份，搓圓（每份約22g）。
- 將奶皇餡分割成8等份，搓圓（每份22g）。
- 將餅皮按平（周邊薄，中間厚），不要太大片，只需包裹到2/3餡就夠。
- 包入一粒奶黃餡，餅皮緊貼餡，然後用手虎口位將皮向上推上並收口。
- 餅模灑上高粉（多餘凳出），麵團撲上少許高粉（多餘掃走），然後放入月餅模內（收口向外），放上焗盤，然後小心垂直按壓（停留動作十秒），保持垂直鬆手脫模。
- 將整盤月餅放入冰格，冷藏30分鐘。
- 預熱焗爐250度，餅面噴少許水，入爐焗5分鐘，出爐掃蛋黃，攤涼十分鐘，再掃一次蛋黃，入爐200度焗7分鐘。
- 出爐後，掃上蜂蜜，入爐180度焗5分鐘。
- 出爐後，放涼一晚（面放一張牛油紙遮蓋）。
- 第二日可以入保鮮盒或包裝，如兩天內未食完，要放雪櫃儲存，食前用焗爐150度焗5-10分鐘。
