脆皮金莎奶黃月餅心得分享（水波爐）

今日吾同大家分享食譜，而係分享焗奶黃月餅嘅經驗和心得。

我家係用東芝水波爐（非植入式廣告），與一般焗爐吾同嘅係。。。冇下發熱線，所以爐溫比較難控制同難捉摸。而我今次嘅心得，主要係針對水波爐，所以如用緊焗爐嘅朋友，就要因應番自己部焗爐皮性來調教啦！不過，如果水波爐都做到，一般焗爐就應該吾會有難道啦！

首先，需要預早一日以上準備奶黃餡。

餡

餡的軟硬程度很重要，太軟太濕焗時就會瀉，係象腳其中一個原因。

分割奶黃餡前，先要將奶黃搓番勻/滑。

餅皮

盡可能要用含水份較少的牛油，因水份會影響餅皮效果。可以用脫水牛油，也可自製脫水牛油。

用手指頭將凍牛油及乾材料搓勻至沙粒狀，然後加蛋搓成糰。要快手，牛油忌溶。

如麵糰搓太耐，牛油開始溶化，麵糰會癡立立，黏手，有油光，代表搓過龍了。正確麵糰應該不黏手，冇油光，啞面爽身的。
如果搓過龍，就算雪過都會影響焗嘅效果，亦係象腳其中一個原因。

麵糰雪30分鐘後分割

組合／包餡

餅皮隔著保鮮紙按平（中間厚，周邊薄），面積大約可包裹1/2-2/3粒餡就夠。將餅皮緊貼著奶黃，然後用手虎口位將餅皮貼著餡邊轉邊向上推，直至包裹整粒餡及收口。

方法1（當日焗）：印模後，將模放在已鋪牛油紙焗盤上脫模，雪30分鐘。

方法2（稍後焗）：印模後，將模放在已鋪保鮮紙的盒內脫模，然後放冰箱冷藏。

焗

方法1：將整盤月餅放入已預熱250度焗爐焗5分鐘。

方法2: 無需解凍，將月餅移放在已鋪牛油紙焗盤上，放入已預熱250度焗爐焗5分鐘。

*水波爐冇得校下火，所以要加多一個焗盤墊底隔熱。

完成後出爐

蛋液

蛋黃加幾滴老抽，然後用畫筆在凸起花紋面掃上薄薄蛋液，來回兩次。

再放入200度焗爐焗4分鐘

出爐後，立即掃上蜜糖，再放入爐燒2-3分鐘。

最後，將放暖的月餅放上烤架，放涼一晚後入盒或包裝。