鹵水拼盤（牛腱、雞翼、雞腎、雞蛋）

今日第一次自家製鹵水汁，過往只會買現成鹵水汁嚟用咋。

話說星期四，去惠康睇吓有咩新鮮生果買，點知裝修緊（局部），D貨重新擺位，蔬果位置竟然變左凍肉櫃。而凍肉櫃又放左好多新款凍肉，全部$79.9/2件，所以我都吾執書，揀吓有乜啱食，最後揀左兩包牛腱同兩包羊胸。

尋日咁啱又經過馬寶道，所以就去左椰子號行吓啦！每次去都會買番少少野，今次就買左黑白胡椒粉同孜然粉，都係十蚊樽，平靚正。跟住就買埋黑芝麻（已烘，特價$22/300g，原價$25），用嚟整芝麻糕夠晒香。當我想比錢時，見到收銀機旁有好多雜貨，如乾薑粉，陳皮粉，薏仁粉，雪梨乾等等。無意中見到一包包鹵水料，心諗可以用嚟鹵牛腱喎，於是就買埋佢啦（$15）。因為未試過，所以問吓老闆娘點處理，跟住佢就比張紙仔我（做法），叫我跟住做就得啦！佢仲話，鹵水汁可以留番下次用，越舊越正，好似潮州鋪果D咁，可以用過百年以上呢！不過。。。最大問題係。。。屋企個雪櫃邊有位可以長期keep住煲鹵水汁呢！

伯爵茶日式芝士蛋糕（焗）

每次買襯忌廉芝士，總會有一個煩惱，就係吾知點去消滅佢，有時真係諗到頭都大晒架。今日我諗左個新食法，就係伯爵茶味嘅日式芝士蛋糕。日式芝士蛋糕就食得多啦！而且仲係阿仔嘅至愛，今次就試吓以日式芝士蛋糕做基本，再配埋伯爵茶混搭一番，吾知效果會點呢？其實我都係亂試吓咋，吾試又點知好吾好味喎。哈哈。

如果大家喜歡伯爵茶味，呢款蛋糕一定好啱你，因呢個蛋糕伯爵茶味都幾出，伯爵茶味係會由淡至濃慢慢滲出嚟，好有層次，但又吾會蓋過芝士味，令到成件事都好夾。

藍莓芝士蛋糕（凍）

超級難得，前兩日（星期四）阿仔突然叫我做個『藍莓芝士蛋糕』比佢食，話好想食喎！為免比佢炸型，話我偏心，所以就趁今日放假，立即行動啦！

我個人比較喜歡Kiri忌廉芝士，但太大盒好難消滅，所以今次轉用鐵塔（分裝），可以快Ｄ清晒。之前用過安佳，卡夫，兩者我都吾太鍾意，因偏咸。

藍莓醬都有不同產地，味道亦會有少許分別，如果冇太高要求，其實任何一間烘烤店買都可以，而我今次就去左二德惠買。

香草墨汁包

阿女話聽日lunch要同同事去野餐，仲話要每人準備一樣食物。

一開始我地諗住整班蘭蛋糕，但瞓醒阿女又改變主意，話想一齊整心太軟。今次我並無就範（好大膽，嘻嘻！），因為放工廚房好煩忙，而且功夫又多，所以我改做Browne。不過吾知佢幾點先返，都係自己搞掂好d（好彩冇等佢咋，成十點至返呀！）。

到左接近9點，收到阿女通知，話要加碼，話一樣食物吾夠，因為同事們會每人做多過一樣食物，所以要我預備多一樣野。跟住又繼續賣嘴頭，話同事話以後冇得再食我嘅美食，要爭取最後機會。。。食喎。

嘩！大少姐，夜媽媽，臨時臨急邊度有料呀！真係吾知可以加到D乜喎？唉！冇辦法，唯有整麵包啦！因為屋企有幾包墨魚汁，所以我就。。。用佢嚟整包啦！（我估同事們應該未食過排，又或者少機會食到掛。）

因為麵包機最多只可打到300g粉，所以我只好做迷你版（15個），一人一個仲有淨，最重要係細細個，吾會太飽。望落都幾可愛呀！QQ地，好似一粒粒石春咁。大家有冇覺得好似一幅黑白相呢？

食譜：香草墨汁包

黑加侖子、雜果仁、朱古力粒 Brownie

呢個 Brownie，係做比阿女聽日 "last day" 嘅散水餅，又係聽日野外午餐嘅甜品。為左方便大家，吾洗食得咁論盡，所以特別轉左迷你杯仔版，一啖一粒，絕對適合啦掛！

今次因為臨時接order，完全在冇準備下，唯有盡用屋企資源，出嚟效果都見得吓人拉！自家製當然要識得隨機應變，吾夠合桃咩？吾緊要，可以加D腰果，加D黑加侖子，再加D入爐朱古力粒，咪得囉。如大家屋企有其他果仁或乾果，一樣可以用架，重點係要 "乾"，同自己鍾意食。

食譜：Brownie做法

蜜汁叉燒

自家製叉燒，首要條件，就係買舊靚梅頭。如果買吾到又點？就梗係吾好做啦！無謂嘥時間同嘥心機嗎！

講真，靚梅頭真係可遇不可求，吾係話買就買到架。如果想買，一定要趁早，係晨早個早呀！晏Ｄ就冇架啦！如果有相熟豬肉檔，就梗係叫佢留比你啦！

呢舊梅頭其實已經買左一星期啦！因為難得遇到，所以我都會買定，雪左隨時可以做。知道今晚齊人食飯，所以早兩日已放回普通格回溫，尋晚就可以醃定啦！

今次我跟東芝水波爐（蜜汁叉燒）做法，揀左混合式焗法。結果，真係好濕潤，一Ｄ都吾乾，而且肉質淋滑。但賣相顏色比較偏淡，而且吾夠焦香。所以我加長左時間，然後再加埋燒烤，賣相至有咁吸引咋。

經多次累積經驗，我都係最鍾意低溫慢煮秘製叉燒做法。低溫慢煮不但肉質濕潤，淋滑，而且仲好夠焦香。

靚梅頭

鳳梨酥

上次整鳳梨酥，做左兩份鳳梨餡，所以有一份存左冰箱保存。差不多都有一個月啦！今日終於有時間可以用埋佢啦！

今次做法與平時吾同，係用左脆皮月餅果皮，我覺得比平時嘅鳳梨酥更好味。而造型方面，今次亦與以往吾同，基本上係冇造型，只係簡約嘅波波球。哈哈！

做法：

餅皮

鳳梨餡