鳳梨奶黃月餅（2018新口味）

又係時候整月餅啦！不過如果吾係因為細妹返左嚟，我都未必會咁快做。事關細妹月中就要返英國，所以我要趁佢走之前，趕快整多幾款口味比佢試。

2018第一爐，梗係要試新嘢啦！今次係鳳梨酥與奶黃月餅crossover呀！連我自己都未食過，吾知夾吾夾呢！嘻嘻。不過阿仔一返嚟就食左兩個啦！冇comment，但就食左兩個，答案應該係正面掛，哈哈。

今年冇買新月餅模，因近幾年實在買得太多，多到冇一百都接近呢！最後仲買／玩到訂製，無論中文名，英文名，什至姓氏，樣樣都造齊，咁就吾驚會同人撞款啦！哈哈。

不過終於都要斷捨離，如成品花紋吾清楚嘅，通通都冇得留低（舊嘅吾去新又點嚟）。其實我冇做大嘥鬼，我將吾要嘅都送晒比姐姐（連有名果d都比埋），冇感到罪惡架，哈哈哈。

轉代糖漿2018

端午過後，又輪到中秋嘅來臨啦（睇廣告都知）！潮流興食奶黃月餅，睇電視都知，排長龍炒黃牛。吾想排餐死，又吾想買貴餅食，唯有自己做啦！自己食自己做嗎！雖然係要花點時間同心機，但起碼知道食左乜落肚，而且仲無添加好好味添，辛苦都值得啦！

至於傳統廣式月餅，已逐漸被人遺忘。不過傳統嘢始終有佢存在價值，因好多人都好似我咁 "念舊"，希望從懷舊食物裡尋回兒時回億。記得細個果時，月餅係好貴，吾係人人食得起，所以當年大部份人都會揀供月餅會（我媽媽是其中一個），不過供完吾代表自己有得食，因為要送禮呀（當年好著重體面）。依家年代吾同，月餅已是人人都食到，可能仲多到食吾晒，送入大口仔添（丟）。

雖然我對月餅興趣不大，但就對做月餅興趣很大啦！哈哈。我喜歡做比家人同朋友食，見到別人食完個個讚，真係好開心，好滿足。

記得第一次做轉化糖漿，已是兩年前的事，之後已冇再買現成糖漿啦！自家製糖漿真係好味好多架，除左用嚟做廣式月餅皮外，仲可以代替蜜糖，除左可以做各式中西甜點，如蛋糕，曲奇，酥點。也可以用嚟煮餸，如雞翼，叉燒等。

轉化糖漿做法按此

*今次改用了檸檬汁（先過濾），待糖水滾後加入。

冰糖陳皮檸檬膏

我又嚟燉檸檬啦！上次燉嘅又飲晒啦！不過其實今次仲有令一個目的，就係燉嚟送禮呀！因為我細妹想飲，而佢又會嚟緊個星期日（29/7）返香港（趁D女放暑假），所以我要準備定啦！話說細妹舊年已講定，今年會返香港，仲話到時要試我嘅燉檸檬，所以一早我已買定真空玻璃樽同包裝，今日終於可以用到啦！雖然只係做比屋企人，但我都要做得好好睇睇，吾好失禮。

今次燉法同以往有少少吾同，我在燉到10個鐘時，用攪拌棒（直接放入燉盅）將全部材料打爛，然後再繼續燉多3個鐘，之後工序就同以往一樣，如入樽，倒轉，放涼等。

而製成品經雪過後（自己食果d），可以見到同平時嘅好大分別，係杰身好多，好似醬／膏咁樣。顏色方面，會比較實，不通透。而味道亦有分別，比以前較濃厚。最重要，係啱阿妹飲，因佢吾愛食渣，依家可以連渣都飲埋，咁就吾怕蹝嘢啦！

藍莓乳酪芝士蛋糕（焗）

話說阿女話想星期四整檸檬乳酪芝士蛋糕，我見噚晚個個都吾返嚟食飯，個廚房比較清閒，咁我咪早一日整定先囉，應該都擺得嘅，多一日啫。

點知今朝收到阿女whatsapp，佢話其實係佢想整蛋糕，吾係想我整蛋糕，唉！擺左烏龍添。算啦！佢吾要咪我自己派囉街坊囉，哈哈哈。

因為買吾到檸檬乳酪，所以就買左藍莓乳酪，其實鍾意咩乳酪咪用咩乳酪囉，冇所謂，最緊要自己啱食。

重點係我鍾意食乳酪多過酸忌廉，而且感覺好似又健康D（其實芝士蛋糕都係肥），原來乳酪配芝士蛋糕又幾夾喎。

今次做左8"模份量，估吾到竟然做到8個細模。

菠蘿叉燒包

每次焗親叉燒，我都會留起偏瘦部分（約200g），用嚟做叉燒餐包餡。因我鍾意食叉燒餐包多d，所以多數都會將叉燒整餐包餡，好少會做中式餡。早幾日整定左個餡，等幾時想食都可以隨時有得用。

今日成日橫風橫雨，冇得出街，留響屋企有咩好做？！梗係整嘢食啦！中午先嚟個瑞士卷，下午再嚟個焗麵包。咁就可以娛樂一天啦！

其實都冇諗過會焗包架，只係阿女無端端話想食菠蘿叉餐包，又話想出去買（添好運），講到咁，我咪唯有整比佢食啦！

最開心嘅係。。。阿女食左一啖後。。。咦！幾好味喎！

瑞士卷（燙麵法）

瑞士卷其實我做得吾多，而燙麵法更從未試過。今次初體驗，就嚟試整卷，真係有d驚驚呀！諗住吾想咁單調，所以加左少少班點（可可粉），將原味瑞士卷變成班點瑞士卷，哈哈。

好彩出嚟效果都吾錯，下次可以試吓用燙麵法嚟整棉花蛋糕，睇吓效果有冇分別先。

＊因為今次係實驗性質（驚失敗），所以冇影到相（步驟），

材料：（25 x 35 cm）

蛋黃糊：
蛋黃　　　4個
砂糖　　　50g
菜油　　　40g
牛奶　　　80g
低筋粉　　80g

蛋白霜：
蛋白　　　4個
砂糖　　　30g
鹽　　　　1/16茶匙

餡：
甜忌廉　　100g
（*或淡忌廉，份量：忌廉100g + 糖粉10g）

做法：

1. 甜忌廉打至企身，放雪櫃備用。
2. 菜油叮一分鐘，然後加入已篩低筋粉拌勻至有粉粒，加入牛奶拌勻。
3. 蛋黃加糖拌勻，加入（2）內拌勻，
4. 蛋白加鹽低速打散，然後轉高速打至泡沫狀，將糖分2-3次加入打勻，直至濕性泡沫（測試：打蛋棒提起，棒端有三角長尾巴倒勾），再轉低速打一分鐘。
5. 將1/3蛋白霜加入蛋黃糊內拌勻，然後再倒回蛋白霜內拌勻。
6. 焗盤鋪上牛油紙，然後倒入蛋糕糊，掃平，在檯面凳兩下（拍走空氣）。
7. 放入已預熱160度焗爐，焗20分鐘。
8. 出爐後脫模放上烤架（蛋糕面向上），將四邊牛油紙撕開。
9. 蛋糕面放上一張牛油紙，面再放上一個烤架，然後反轉。
10. 取走烤架，將牛油紙撕走（蛋糕底向上），再蓋回蛋糕上放暖。
11. 放暖後，將蛋糕先捲一次，稍作定型。
12. 將蛋糕卷平放好，塗上一層忌廉餡（收口留2cm不要塗），然後捲起，用牛油紙包實，放雪櫃雪兩小時即可。

日式芝士蛋糕（麵粉版）

第一次加麵粉做日式芝士蛋糕，無論係外型或者質感，其實分別都不大。

咁多款芝士蛋糕，我最吾好就係日式芝士蛋糕，但對仔女反而就最鍾意。其實我比較鍾意食芝士凍餅，因有消化餅低，又有海棉蛋糕夾心，食起嚟冇咁漏（如：雲石芝士，生果芝士）。

今次蛋糕同過往一樣，一樣爆面，嗚嗚嗚！水波爐焗蛋糕始終都爭Ｄ，如果有時間可以試多幾次（可惜我冇quota），掌握啱爐溫同時間，應該會有改善。其實做到咁我都滿意啦（自我安慰）！哈哈。

＊女話鍾意今次質感／口感多d，乾身d，冇以往咁濕潤，但芝士味吾夠。所以下次我會繼續用呢個食譜，但就會買番Kiri忌廉芝士。原來真係一分錢一分貨，食得出架。（今次二德惠買隻MG，吾掂。）