今日同大家示範一個秘製叉燒醬，以後有左佢，就吾洗再買叉燒醬啦！
做叉燒除左個醬重要外，買舊靚肉都非常重要。每次做叉燒，我都必定親身去買，絕對吾會交托工人姐姐做，因為我都係信自己多d（始終佢地都會易比人呃）。
今次比我買到舊靚梅頭，盛惠$120。豬肉佬通常會將梅頭打橫切（如第一刀），切開肉雪花，分部肥肉。而我今次就叫佢打直切，因為我見燒臘檔d叉燒肥肉部份係打直嘅。
今次焗法又再改左少少，再配埋自製糖漿，嘩！成件事真係意想不到的好呀！
今次成品可以話係我焗過咁多次叉燒以來最好嘅一次。以後可 以照做，吾洗再研究啦！
材料：
梅頭 2斤（約10"長x1"厚）
生粉 4湯匙
醃料：
生粉 4湯匙
砂糖 5湯匙
幼鹽 1湯匙
雞粉 1/2湯匙
海鮮醬 2湯匙
蠔油 2湯匙
芝麻醬 1/2湯匙
生抽 1/2茶匙
老抽 1/2茶匙
乾葱茸 1/2湯匙
蒜茸 1茶匙
玫瑰露 1/2湯匙
雞蛋 1隻
掃面：
麥芽糖 適量
熱水 適量
做法：
- 梅頭洗乾淨（不用瀝乾水），切3cm厚件，加生粉拌勻醃4小時（放雪櫃）。
- 4小時後，取出沖洗乾淨，瀝乾，再用廚紙抹乾。
- 將全部醃料拌勻，放入梅頭拌勻，入保鮮盒存雪櫃醃一晚。
- 預熱焗爐200°C，將豬肉連汁料全部放入焗盤，加錫紙蓋好，焗50分鐘
- 預熱焗爐240°C，將豬肉放上烤架，入爐焗15-20分鐘至夠色，反轉再焗15-20分鐘至夠色。
- 取出掃上糖漿，入爐180°C焗5分鐘，反轉掃糖漿，再焗5分鐘。
- 出爐後放涼，切件享用。
出爐後，將叉燒放入電飯煲，然後倒入餘下糖漿浸住，保溫1小時，肉質會更鬆軟，更好味。
梅頭洗乾淨
加生粉拌勻，存保鮮盒放雪櫃醃4小時。
醃料拌勻
豬肉拌入醃料，醃一晚。
將豬肉連醬料倒入深盤
蓋上錫紙，200度焗50分鐘。
出爐後撕走錫紙
放上烤架，240度焗15分鐘，反轉再焗15分鐘。
自製糖漿
掃上糖漿，180度焗5分鐘，反轉掃糖漿，再焗5分鐘。
出爐後，將叉燒放入盤，倒入餘下糖漿浸住1小時（間中反轉）。
亦可將叉燒加糖漿放入電飯煲保溫1小時。
