貝殼型黑麥麵包

好開心呀！今日又可以再來「麵包雲」上堂。今次揀嘅係Level 3麵包課程，雖然比上次Level 2（黑松露蘑菇麥麵包）難度高一級，但其實一D都吾難。

知吾知點解會揀呢個包呢？係因為我想好學鎅花囉。以前麵包鎅花，我係跟包友教路，用吉列剃鬚雙刀片，但始終都鎅吾成功，多數都是卡著（巢皮），吾可以一刀到尾。今次睇完Miss示範，原來係需要用專業刀柄（柄頭係微彎曲）再配合刀片來使用，而力度係應該放鬆，手勢亦應該自然。聽落咪以為好易，其實做落至知。鎅第一個時，我真係好冇信心，不過效果都比想像好。經Miss再指導後，發現原來係我落刀可夠恨，所以鎅得吾夠好。最後，終於做到啦（雖然功夫麻麻）。l由於今次鎅花成功，所以。。。我。。。就忍痛買左佢地set專業來路刀片啦！$136呀（吉列刀片$10咋)！Miss話可以用一世喎（如無意外），諗落都抵啦（自我感覺良好）！

睇吓，我D包包係咪好靚呢？我就好滿意啦！仲有。。。仲有，今次課堂仲教做多個青橄欖提魚牛油醬，用嚟配呢個包，味道真係好夾呀！

焗紅豆西米布甸（少甜）

原來已經有兩年冇整過啦！不過今次吾係整芋蓉，而係整紅豆蓉呀！因為屋企只得紅豆蓉咋！

今晚突然興起。。。心血來潮。。。忽然之間。。。好想。。。好想。。。好想食焗西米布甸。

咁。。。我咪立即行動囉！嘻嘻。坐言起行嗎！即時叫姐姐Check吓有冇西米，Oh，Perfect晒！竟然全部材料都有齊，可以開得工啦！

火鍋沙爹湯底

襯天氣仲凍凍地，要爭取時間打邊爐至得。食火鍋最重要當然係材料新鮮，但湯底都吾可以忽略。不過其實我都冇話要煲個靚湯嚟打邊爐嘅，都係就咁買包現成沙爹湯咋。但今日就一反常態，搞搞新意思，煲左個沙爹湯呀！好特別呢！真係從來冇諗過，竟然會自製沙爹湯，嘻嘻。

亂打亂撞，又比我整左個似模似樣，冇九分都有八分嘅。。。「偽版~方X記」。。。馳名。。。沙爹湯底。我覺得自己真係好有天份。。。偽裝呀！

呢個湯底除左啱火鍋用之外，仲好啱配湯粉麵呀！味道似足越南沙爹生牛河個湯呢！

如果大家吾怕煩（其實一d都吾煩），就不防試吓啦！

雜錦牛油曲奇

今日終於到左最後一日假期啦，雖然只得一個人，但我都吾會悶，因為已習慣晒啦！其實留響屋企hea吓都吾錯呀！

不過。。。其實。。。我今日係有個特別任務，就係幫阿女準備D小禮物，做比佢派街坊。哈哈，其實阿女平時都好鍾意同我落order架。但今次就誇D，佢話要派三日喎，仲吩咐我要整D擺得，可以keep得耐D嘅野。（咁我又點出到街呢！嗚嗚嗚！）

講番今次嘅手作，原本我係想整唧花曲奇，但屋企又冇金桶牛油，所以咪轉用無鹽牛油囉！點知。。。加完粉。。。攪完團。。。之後。。。直覺話比我知，應該係唧吾出嘅！哈哈。因為太杰啦！要唧！一定會手殘兼爆袋。所以，算把啦！放棄啦！

呢個故事係教訓我，以後要做唧花曲奇，一定要用番金桶牛油。但今次都吾會嘥左嘅，都可以做其他曲奇嗎！

當做完第一條朱古力時，感覺好似有d單調，於是做第二條咖啡時，就即刻補飛，加左d原粒已烘杏仁（之前用淨），到第三條綠茶啦！又加乜好呢！哈哈！好彩有d食淨嘅韓國蜜糖杏仁啫，咁又可以順便清倉啦！

用一個麵團，做齊3種味道（朱古力、咖啡杏仁同綠茶蜜糖杏仁），可以一次過滿足晒你嘅胃口掛。

今次都係第一次用唧花材料嚟做切片曲奇，真係錯有錯著，估吾到效果又吾錯喎。口感鬆化，好似食緊唧花曲奇一樣，只係外型吾同啫，以後可以繼續做呢個食譜。

一口缽仔糕

大家有冇食過坤記缽仔糕呢？我就食過啦！真係吾覺得佢好食囉！可能我吾識欣賞掛。其實自己做都吾難啫！而且仲平好多添。

今日我就做左啦！仲做左39個咁多添。吾派街坊都吾得啦！

材料：
粘米粉　100g
澄麵　　25g
馬蹄粉　12g
蔗片糖　120g
水　　　425g
紅豆　　適量

製法：

1. 紅豆洗淨浸1小時以上，煲30分鐘，熄火焗30分鐘，再煲30分鐘，再焗30分鐘（可重複直至煲淋，要保存原粒狀態），備用。
2. 粘米粉、澄麵和馬蹄粉加水140g拌勻，過篩。
3. 片糖加水285g煮溶，然後撞入粉漿內，一邊落一邊攪，攪至完全幼滑及冇粉粒。
4. 將紅豆加入缽仔或碗仔，倒入粉漿至9成滿，大火蒸30分鐘或至熟即可。

朱古力梳乎厘

今日為粉絲示範「朱古力味梳乎厘」，不過今次冇上次升得咁靚，因為我冇用匙柄圍杯邊鎅一圈，所以效果大家睇得出。。。好明顯啦！真係冇成個面升起架。

不過都只係外觀上吾同啫，對味道完全冇影響嘅。如果大家想再整得靚d，高級d，除左圍杯邊記住鎅一圈外，仲有就係出爐後，響梳乎厘面灑上防潮糖霜，咁賣相同效果就可即時升級啦！

其實材料同做法與橙酒梳乎厘冇乜分別，只係將可可粉代替橙酒，轉變口味啫。不過講到味道。。。我始終都係覺得基本嘅。。。橙酒梳乎厘最好味。

荔枝奶凍

屋企有盒荔枝果泥，仲有一罐荔枝肉，本來想整一個8"慕士蛋糕，但到最後我都係轉左軚。轉左做一杯杯囉，諗住食得方便D嗎！