牛油蛋撻

武漢肺炎疫情嚴重，聽政府呼籲，盡量留在家中，避免去人多地方。所以今日放假吾出街，乖乖地留響屋企，整吓甜品，打發吓時間。

原來都有Ｎ年冇整過蛋撻啦！今日雖然係重溫，但因為換左新爐，所以又變左一個新嘗試／新挑戰。

第一次用4S焗蛋撻，效果又幾好播。

橙皮醬奶油瑞士卷

嘩，好耐冇整卷啦！耐到都吾記得幾時啦！哈哈。

今日放假，想搵D嘢做吓，於是就諗起整瑞士卷，因簡單得嚟又冇咁普通呀！

第一次用4S做瑞士卷，估吾到效果又幾好喎。記得之前用水波爐，每次焗襯瑞士卷，都會焗時個面漲起，然後又會甩皮，所以永遠都冇面見人，只能做反卷。

見到今日嘅成果，真係有D興奮呀！以後又可以做多D卷啦！

日式原味芝士蛋糕 (4S)

第一次試4S焗日式芝士蛋糕，呢款蛋糕係阿仔同阿女最鍾意嘅芝士蛋糕款式，但就吾係我最愛，因我鍾意芝士凍餅多d。

見好多谷友用4S焗蛋糕，都會攝筷子響爐門邊，所以我都試吓跟，睇吓效果係咪真係咁靚先得 (因為我之前焗過2次蛋糕都失敗)。

雖然買左4S兩個月，但仲有好多嘢未試，所以依家趁有時間，都想試多d佢嘅效果。尋晚我就試左蒸飯，效果都好滿意。

材料：

忌廉芝士　200g（室溫）

無鹽牛油　40g（室溫）

蛋黃　　　4隻

檸檬汁　　2茶匙

低筋粉　　40g

粟粉　　　20g

牛奶　　　200g（室溫）

蛋白　　　4隻

砂糖　　　60g

做法：

1. 忌廉芝士及牛油放大盤內，隔60度熱水，用電動打蛋器打至幼滑。
2. 將蛋黃分4個加入打勻，然後加入檸檬汁打勻。
3. 加入已篩低筋粉及粟粉拌勻
4. 將牛奶分3次加入打勻
5. 蛋白慢速打散，然後轉高速打至泡沫狀，將糖分3次加入打勻，打至7成企身（提起蛋白霜寫字，字形可保持3秒不消失）。
6. 將半份蛋白霜加入蛋黃糊內拌勻，然後再加入餘下蛋白霜拌勻。
7. 麵糊從高處倒入蛋糕模內，然後將模敲2下，將蛋糕模放入深盤內。
8. 深盤注入水至蛋糕模2/5高，放入已預熱150度焗爐，焗60分鐘或至熟。（4S秘訣：爐門邊要攝＊筷子，因須疏氣。）

＊我用矽膠墊，因耐高溫，而且物料不會損壞爐門。

Facebook專頁停用

今日有個壞消息要向大家宣佈，就係我嘅Facebook帳戶同page都被Facebook無故停用了。

所以暫時我會響Facebook消失，希望會有奇蹟出現，可以再同大家見面。

如果我地有緣嘅話，希望你地會見到呢個通知啦！

惠而浦4S蒸焗爐開箱（二）

買電器嘅嘢，真係話吾埋，好睇運氣／撞手神。估吾到同水波相同命運，在短時間內出問題（吾知關吾關間鋪事呢）。

記得水波第一次出問題，同今次一樣，都係噪音，但今次最吾同嘅係，機都吾洗拆，就即時話換過部。

CS好快手，星期五檢查完，星期一約送機，星期二就收啦！原箱新貨，一機換一機，希望行直接送嘅貨會好d啦！

牛油蛋糕（4S）

放假吾敢出街，唯有留響屋企，焗吓蛋糕自娛吓。

4S第一次焗蛋糕仔，無論時間同效果都比水波爐好，果然冇買錯（其實留意左一段時間）。

以前水波焗cupcake，永遠都會焗到好似火山爆發（中間尖起，然後流漿），有時會有一半被熱吹埋一邊（傾斜），搞到好似有條象鼻咁。

今日4S照用上下火熱風對流（測試），效果明顯可見（吾洗多講），真係同水波分別好大呀！仲有另一個好重要嘅係.....蛋糕面吾會變濕呀！

一口合桃酥（牛油）

近幾年，我都會做大批曲奇或酥餅嚟送禮，今年當然都吾例外。

因為屋企冇豬油，所以我就轉用左牛油，雖然牛油冇豬油嘅酥，但就比豬油香。