不過我間中都會順下佢意嘅，鬼叫佢係我老細咩！受人二分四，冇計啦！
當我照跟指示煮完後，亦當佢食完後，佢會比嘅評語係 “OK啦！差吾多啦！”
聽到呢度，我當堂辣著左啦！如果只係OK，真係差吾多，我就吾洗做咁多功夫，吾洗嘥咁多時間，最緊要係嘥晒我一番心機囉！嗚嗚嗚！
我當然有還拖啦！同佢講，如果真係只係OK，真係差吾多，我就一切照舊，做番簡單煮法啦！佢即時改口話，梗係吾係啦！梗係好過平時啦！梗係。。。。。
講到呢到，我就諗起有句話「早知今日，何必當初呢？」。d男人就係咁衰啦！有果時又吾珍惜，到冇至嚟後悔。哈，老娘吾發火，當我病貓。啍！！！
今日又等我嚟滿足吓佢個胃啦！今次我改良過「冇咁罪惡版」，用焗代替炸。
＊後記：老貓燒鬚，原來用碟遮住蒸傳熱慢，所以肉蒸吾夠淋。好彩未夠鐘開飯，可以比我補飛，嚟得切用智能煲再煮佢15分鐘，搞掂啦。
材料：
五花腩 1斤
梅菜 1碗
蔥頭 2粒
蒜頭 4粒
薑 4片
南乳 1湯匙
柱侯醬 1湯匙
調味料：
五香粉 1茶匙
砂糖 1茶匙
生抽 2湯匙
紹酒 1湯匙
麻油 1茶匙
上色：
老抽 1湯匙
生抽 1湯匙
做法：
五花腩洗淨，烚半個鐘，沖洗後抹乾。
豬皮掃上一層老抽
然後再掃上一層生抽
放入已預熱230度焗爐，皮向上，焗30分鐘至夠色。
出爐後放涼，切件。
梅菜浸幾分鐘，沖洗乾淨，切粒，然後加砂糖（材料以外）白鑊炒至微焦。
將腩肉鋪好（皮向下）入碟，再鋪上梅菜（蓋住肉）。
爆香蔥頭，蒜頭及薑片，加入南乳，柱侯醬炒勻，再加入調味料及半碗水煮滾，然後倒入梅菜面。
用錫紙包好
放入蒸爐蒸2小時
出爐後倒出汁液，用另一隻酵蓋住，然後反轉，再將醬汁們回肉面即可。
